民國時期著名嘅宋氏三姐妹之中，妹妹宋美齡嫁予蔣介石，1927年喺上海舉行婚禮。兩人嘅身份令呢場婚禮備受矚目，當時唔少報道都話兩人嘅結合係政治婚姻，亦都係「軍閥同財產嘅結合」。不過撇開政治因素，蔣介石的確對宋美齡情有獨鍾，就連立遺囑都處處為宋美齡考慮。

同宋美齡結婚之前，蔣介石已經有一位原配夫人同兩個侍妾，仲有蔣經國、蔣緯國兩個仔。而宋美齡嫁入蔣家之後就一直無所出，同蔣介石嘅兩個仔嘅關係又唔係特別親厚，蔣介石擔心自己死後宋美齡喺屋企嘅日子唔好過，於是兩度立遺囑叮囑兩個仔，要佢哋當宋美齡係母親一樣好好對待。

1934年，蔣介石喺日記入面記錄咗佢為宋美齡立嘅第一份遺囑，除咗交代自己死後要同愛妻美齡同葬喺紫金山、留俾宋美齡嘅財產之外，仲要求兩個仔「皆須聽從其母美齡之教訓，凡認余為父者只能認余愛妻美齡為母，不能有第二人為母也。」兩年之後，蔣介石再立遺囑，又再次強調宋美齡係自己今生惟一嘅妻子，交代兩個仔：「如你們自認為為我之子，則宋女士亦即為兩兒之惟一母，我死之後，無論何時，皆須以你母親宋女士之命是從，以慰吾靈是屬。」蔣介石一再強調宋美齡嘅身份，就係想要蔣經國、蔣緯國承認宋美齡係佢哋嘅惟一合法母親，確立宋美齡喺屋企嘅地位。

圖為蔣介石夫婦與蔣經國，原圖嚟自網絡。